दोन्डा ओन्डो: पेयांय (हो कहानी )

सिदा सोमय रेय:अ कजि ना लेका लिज: तेङ मशीन क टइकेना। पेयांय कोगे हतु-हुतुरे सुतम् बोरके'ते लिजः तेङेतन टइकेना ओन्डो हतु-हतु तिनुलके'ते का रेदो हाट मुसिङ हाट कोरे को अकारिङेतन टइकेना। मिडो पेयांय लिज: रेगे लिज:को मोटरीके'ते दोयारे गुरूंडा काएते तिनुल अकारि लगिड़ ओवः एतेःए ओल्लयना।
बुरू तोडं होराःए सेनो: तन टइकेना। दरू बुदड् तला होरा बुडु-बुडुतन अ:ए सुगंलगे सेनो तन टइकेना। चिमिनंते अकारिङेरे चिमिन टाका पोएसा होबओवा मेन उड़ु:उड़ु:'ए सेनो:तन टइकेना। बो:रे अर:अ कोदोरन् मियड़ मरंलेकन बटोवा दोन्डा पतह बितररेते रटा-पटातनेःए निर ओल्ल लेना: ओन्डो: अए समानं होरा निर कोटो' कि:इते मियड् दरूबुटारे हेपडाकने ते ए दोड़ो:-दोड़ो: वाइतना। दोन्डा निरे तनरे पतह रदा-पदा सड़ीते पेयांय बेटें तबेयना ओन्डो बोरो- गिसिरतेःए तिंगुतबेयना। बोरो मरङ्तेए उड़ू:तना चि- "निःइ दो अलोम सेनोवा मेन्ते होरा-ए निरकोटोंकेडिञा ओन्डो: ना दो दरूबुटारे हेपडाकने ते जोममेयाञ मेन्तेए दोड़ो: दोड़ो: वाञतना।" एन्का उड़ू:के'ते दोन्डा:ए कुलिइतना "मोके खाइबो कि लुगा खाइबो।" एन्काःए मेतयरेयो दोन्डादो दोड़ो: दोड़ो:ए तन्गेया, नेन दोडादो अञो ओन्डो लिजा:ओ जोमेतेयःए नमतना मेन उड़ु:ते पेयांय बोरोतेए तीरतीर चबायना। मेन्दो अञ चिन: रेय: अ:ए त:रेञ् जोमइचिना नेन लिज: मोटरीतेञ जोमेक:ए मेनते कुलि तन:ए - "ने तेबे लुगानीं खाउ मोके चाडि दाउ" ओन्डो: पेयांय एन्तः अएते ओटङेन तनिइ लेक:ए निरेयना।