ओते दिसुम अर जियु कोव: सिरजोन कानि

सिरजोन एनेटेः रे गोटा दिसुम हेन्दे नुबः गे तइकेना। ओते क तइकेना। होयो क तइकेना। दःक तइकेना। रिमिल क तड़केना। सिंगि, चन्डु: इपिल्ल को कको तइकेना। गड़ा, बुरू क तइकेना। दरू, दिरि, तसङ दुम्बु क तइकेना। मनोआ को कको तइकेना। जियु जोन्तु को कको तइकेना ।

मुसिङ दिन रेयः कजि तना । "ततङ” (सिंगबोंगा) हेन्दे-नुबः दिसुम बुगितेः नेल केड़ा। ओते होयो दः मनोआ, जियु-जोन्तु, दरू-दिरि, तसड- दुम्बु, सिंगि, चन्डु: इपिल्ल को बंकु दिसुमेः नेल बियुर केड़ा। निमिन मरङ दिसुम रे ततङ जानः जकेड कए नेल नम केड़ा। अःए एसकर गेए नेलोः लेना। समः सिइ-सोः ए ओन्डोः टोड-टोड दिसुम नेल केते ततङ एसुइ दुकु जना।।

ततङ निदे सिंगि सुन्दर, सुगडा दिसुम बइ उडु: उनुडुः रे हलय-बलय लेना एनकाते दिसुम बइ-बनइ रे लगातिङ जना होयोः बइ केड़ा। दः बइ केड़ा। रिमिलः बई केड़ा। गोटा दिसुम दः गे दः लेना। सिंगि, चन्डु: ओन्डोः इपिल्ल कोः ए बइ केड़को। सिगि,चन्डु: ओन्डोः इपिल्ल कोआः मरसल ते हेन्दे) नुबः निर जना। दिसुम मरसल ते मरसल जोलोमोलो जना।

ककोम ओन्डो: होरो सिरजोन

नेना को बइ केड़ाएते, ततङ् ओते दिसुम बइ पइटि रेः आचु जना। ओते बइ लगिङ ककोम ओन्डोः होरो नुतुम जियु किञ् सिरजोन केड किञ । नेन ककोम ओन्डोः होरो ततङ कजि ओन्डोः आंदे ते ओते बइ पनाइटि किन एटेः केड़ा। मेन्दो ककोम ओन्डो: होरो ओते बइ पइटि ककिन दइ जना चिनः मेनतेचि ककोम ओन्डो: होरो द: बितरे एते हसा किञ अगुइ तन सोमए रेगे हसा, दः रे लेयान तन तइकेना। ककोम ओन्डोः होरो ओते क बइ दइओः तेयः किञ अटाकर केडा। एन्ते ककोम ओन्डो: होरो ततङ तः किञ् उजुः लेना ओन्डोः ओते क बइ दइओः तेयः करन किन जगारइ तना।। नेन कजि अयुम केडते ततङ एसुइ दुकु जना एसुइ मोन जि जना। न रेयोगे ओते बनइ उडुः उनुडुः रेगेः तइन जना एनतेः उडुः तना, मुसिङ दो ओतेज बइ बपाडेगे।

 

                                        काकोम (केकड़ा)

                                                                    होरो (कछुआ)
लेन्डड़ : सिरजोन

मुसिङ दिन रेयः कजि तना। ततङ सि:इ सबः जएगा सेनोः जना। एनतः रे एसकर गे निरल जितेः उडुः तना। मेन उडुः बुल रिङ ते अचाकागे ततङ अयः जोम तिते, जोम बुलु गोसोः जना। नेन गोसोः गोसोःन रेगे बुलु रेयः उमु एते, जिलिङ, पतला, कजङ्न, दः ओन्डोः ओते रे जिड् तइन बरिया जियु किञ सिरजोन जना। नेन बरिया जिउकिन रे मिन्डो दो सन्डि ओन्डोः मिन्डो दो एंगा तइ केना। नेन गोसोः ओन्डोङ बरिया गतड़ जियु किन दः तला रेः एम तडकिञआ। नेन जियु किञ अः एम केडकिञ् चिमिन बोरोसो जोका जान अता-पता गे क अटकर जना। ततङ ओन्डो: गे उडुः तेः हलय-बलय लेना। ततङ उडुः तनाचि "लेन्डड किन सिरजोन के किञ रे जकेड, ओतेबइ रेयः योजना ओन्डो: पनाइटि समागे जन गेया तोरं?

 

 

लेन्डड (केचुआ)

 
लेन्डड ओन्डोः ओते बनइ

चिमिन बोरोसा बिरड जना । ततङ लेन्डड किन दः रे एम केड़ किन तेयः। नेन लेन्डड किङ् दः बितर रे ओते बइ पइटि रेकिज कुरूमुटआ कन तइकेना । नेन लेन्डड किन सोमए सुगड़ा लेका तेकिञ् मिडेन लपादि लेना। सोमए उड़ि लेकाते लेन्ड होन को, गंड़ा को संगि पोसा नितिर लेना। नेन लेन्डड को दः बितर रे हसा को जोम तन तइकेना ओन्डो: हसा गेको जेजे:ए तन तइकेना। एन लेकाते चिमिन बोरोसो चनब लेन्डड को जेजे:ए त हसा सुए सुएते संगि उंडि लेना ओन्डोः दिन बोचोर ते दः चेतन जकेड नेल नम लेना लेन्डड कोअः जेजःए हसा-गदि, होयो ओन्डोः जेटे जुटिड् अर जेटे लोलो ते सुए सुएते रो जना। हसा रो केटेः जनाः। नेलेकाते दिन दोड़ोब ओन्डो: जोरोङ बोचोर ते हसा से टका टका जानते, ओते रेयः सिरजोन होबा जना। ओते बनइ ओन्डोः ओते रेयः सुगड़ा सुन्दर नेल केते ततङ एसुः इ रांसा जना। रांसा ते अकुल-बकुल लेना। रांसाते मिसाए लेयोनेन, मिसाए जोकोनेन तना। नेन ओते ओकोन तः दो सोमन गे बइ जना। ओकोनतः दो डकुड-मुकुड बइ जना। ओकोनतः दोड़ा-मोड़ा ओन्डोः ओकोनतः दो चुमकुड-डुमकुड गे बइ जना। ओकोनतः दोड़ा बइ लेना, एनतः दो दोरेया बइ लेना। ओकोनतः डकुड-मकुड बइ लेना, एनतः दो बन्दा पुकुरि को बइ लेना। ओकोनतः लोर-लोगोर बइ जना एनतः दो गड़ा बइ जना, ओन्डोः ओकोन तः डिपा बइ लेना एनतः दो बुरू को बइ जना। एनकागे ओकोनतः सोमतोल बइ लेना, एनतः दो ओते सोमतोल गे बइ जना ।

जियु - जोन्तु को सिरजोन

एसु सुगड़ा ओते, बुरू, गड़ा, बंदा, पुकुरि ओन्डोः दोरेया बइ जना । मुसिङ दिन ततङ गोटा दिसुम होनोर जना सिः सोःए ओते दिसुम नेल केड़ा। नेंगेड़ा पताड़ा बिर बुरू को: नेल केड़ा। ओते दिसुम रे, बिर बुरू रे जिबोनन जियु-जोन्तु को सिरजोन को तेयः उड़ु: केड़ा । किलिमिलि तसङ दुम्बु, ओन्डोः दरू को सिरजोन तेयः उड़ु: केड़ा। ततङ किलिमिलि जड़ को हेर केड़ा। बिड केड़ा। सोमए सुगड़ा लेकाते हेर बिड़ जङ को ओमोन लेना। दिन बोचोर लेकाते ओते दिसुमतसङ दुम्बु ते, नइते दारू ते पेरोः लेना। सँगि लेना। बिर बुरू दरू कोते सहजो सिंगर लेना। ओते हसा तसङ दुम्बु ते सुंगड़ा सिंगर लेना। ततङ जकेड सुगड़ा सुन्दर ओते दिसुम नेलते: रसिका जि लेना। एन्ते ततङ् सुगड़ा ओते दिसुम रे होयो रे द: रे तइ- तपइन जियु-जोन्तु को सिरजोन तेयः योजनाः बइ केड़ा। ओते होयो ओन्डोः द: रे तइन किलिमिलि जियु-जोन्तु, बिर जिलुको, चिदुचोपोरोड को दः जियु को जोड़ा जुडिः सिरजोन केड़ कोआ। दिन बोचोर लेकाते जियु-जोन्तु पुंजि पोवा, संगि नितिर लेना।

ततङ नेन सुगंड़ा दिसुम रे, दिसुम रेयः सबिन जिनिसि कोः बइकेड़ा। साबिन जियु-जोन्तु को सिरजोन केड् कोआ। मेन्दो मनोआ को बं कुते एसकर गे ओन्डोः अए सुमड़ गेए तइ केना। एसकर सिःसोःए रे जिबोन कोलोमोलोगेःए अदाए तइ केना। मनोआ को क तनते, जिबोन जि रे जान रांसा-रसिका क तइकेना। एनका उड़ु: बिकोल ते अ:ए मनोआ को सिरजोन तेयः योजना बइ केडा।