सरजोम बा तरत ब्ह पोरोब

बा' मुनु जनागर उनुरूम  - (Part - 01)

'हो' कोअः "बा मुनु जनागर" रे हो जति कोअः सिरजोन ओन्डोः अकोव: उनुरूम मरसल अंका कना। बा मुनु जनागर रे, हो जति कोअः सिरजोन, अकोअः उनुरूम, संसकिर दोरोम, मान मनातिङ, दोन-बिन्त, सहित ओन्डोः ओते, रिमिल, चुन्डुः, इपिल्ल, होयो, गड़ा, बुरू, नइ, दरू, तसड-दुम्बु ओन्डोः कलि मिलि जियु-जोन्तु कोअः सिरजोन बुटा संगोम गलङ कना।
     हो जति रे "बा पोरोब" रेयः एनेटेः हो जति कोअः सिरजोन मुनु जनागर रे सरूबा कना। सिरजोन एनेटेः रे गोटा दिसुम हेन्दे नुबः गे तइकेना। ओते क तइकेना। होयो क तइकेना। दःक तइकेना। रिमिल क तइकेना। सिंगि, चन्डुः, इपिल्ल को कको तइकेना। 

गड़ा, बुरू क तइ केना। दरू, दिरि, तसङ दुम्बु क तइकेना। मनोआ को कको तइकेना। जियु-जोन्तु को ककोu तइकेना। मुसिङ दिन रेयः कजि तना। "ततङ" (सिंगबोंगा) हेन्दे-नुबः दिसुम बुगितेः नेल केड़ा। ओते होयो दः मनोआ, जियु-जोन्तु, दरू-दिरि, तसङ-दुम्बु, सिंगि, चन्दुः इपिल्ल को बंकु दिसुमेः नेल बियर केड़ा।

     निमिन मरङ दिसुम रे ततङ जानः जकेड कःए नेल नम केड़ा। अःए एसकर गेःए नेलोः लेना। समः सिःइ-सोःए ओन्डोः टोड-टोङ दिसुम नेल केते ततङ एसुइ दुकु जना। ततङ निदे सिंगि सुन्दर, सुगड़ा दिसुम बइ उडुः उनुडुः रेः हलय-बलय लेना। एनकाते दिसुम बइ-बनइ रेः लगातिङ जना। होयोः बइ केड़ा। दः बइ केड़ा। रिमिलः बइ केड़ा। गोटा दिसुम दः गे दः लेना। सिंगि, चन्दुः ओन्डोः इपिल्ल कोः ए बइ केड़को। सिंगि, चन्दुः ओन्डोः इपिल्ल कोआः मरसल ते हेन्दे- नुबः निर जना। दिसुम मरसल ते मरसल जोलोमोलो जना।

ककोम ओन्डोः होरो सिरजोन

नेना को बइ केड़ाएते, ततङ ओते दिसुम बइ पइटि रेः आचु जना। आते बइ लगिङ ककोम ओन्डोः होरो नुतुम जियु किञ सिरजोन केड़किञ। नेन ककोम ओन्डोः होरो ततङ कजि ओन्डोः आंदे ते ओते बइ पनाइटि किञ एटेः केड़ा। मेन्दो कलोर ओन्डोः होरो ओते बइ पइटि ककिञ दइ जना। चिनः मेनतेचि ककोम ओन्डोः होरो दः बितरे एते हसा किञ अगुइ तन सोमए रेगे हसा, दः रे लेयान तन तइकेना। ककोम ओन्डोः होरो ओते क बइ दइओः तेयः किञ अटाकर केड़ा। एन्ते ककोम ओन्डोः होतेरो ततङ तः किञ उजुः लेना ओन्डोः ओते क बइ दइओः तेयः करन किञ जगारइ तना। नेन कजि अयुम केड़ते ततङ एसुइ दुकु जना। एसुइ मोन जि जना। न रेयोगे ततङ ओते बनइ उडुः उनुडुः रेगेः तइन जना। एनतेः उडुः तना, मुसिङ दो ओतेञ बड बपाडेगे।

लेन्डड़ : सिरजोन

मुसिङ दिन रेयः कजि तना। ततङ सिःइ सबः जएगा सेनोः जना। एनतः रे एसकर गे निरल जि तेः उडुः तना। नेन उडुः बुल रिङ ते अचाकागे ततङ अयः जोम तिते, जोम बुलु गोसोः न जना। नेन गोसोः गोसोः न रेगे बुलु रेयः उमु एते, जिलिङ, पतला, कजडन, दः ओन्डोः ओते रे जिड़ तइन बरिया जियु किञ सिरजोन जना। नेन बरिया जिउकिञ रे मिन्डो दो सन्डि ओन्डोः मिन्डो दो एंगा तइ केना। नेन गोसोः ओन्डोङ बरिया गतड़ जियु किञ दः तला रेः एम तडकिञआ। नेन जियु किञ अः एम केडकिञ चिमिन बोरोसो जोका जान अता-पता गे क अटकर जना। ततङ ओन्डोः गे उडुः तेः हलय-बलय लेना। ततङ उडुः तनाचि "लेन्डड किञ सिरजोन केड़ किञ रे जकेड, ओतेबइ रेयः योजना ओन्डोः पनाइटि समागे जन गेया तोरं?

लेन्डड ओन्डोः ओते बनइ

चिमिन बोरोसा बिरड जना। ततङ लेन्डड किञ दः रे एम केड़ किञ तेयः। नेन लेन्डड किञ दः बितर रे ओते बइ पइटि रेकिञ कुरूमुटआ कन तइकेना। नेन लेन्डड किञ सोमए सुगड़ा लेका तेकिञ मिडेन लपादि लेना। सोमए उड़ि लेकाते लेन्डड होन को, गंड़ा को संगि पोसा नितिर लेना। नेन लेन्डड को दः बितर रे हसा को जोम तन तइकेना ओन्डोः हसा गेको जेजेःए तन तइकेना।

                         एन लेकाते चिमिन बोरोसो चनबते लेन्डड को जेजेःए तड हसा सुए सुएते संगि उन्डि लेना ओन्डौंः दिन बोचोर ते दः चेतन जकेड़ नेल नम लेना। लेन्डड कोअः जेजः ए हसा-गदि, होयो ओन्डोः जेटे जुटिड अर जैटे लोलो ते सुए सुएते रो जना। हसा रो केटेः जना। नेलेकाते दिन दोड़ोब ओन्डोः जोरोङ बोचोर ते हसा रो टका टका जानते, ओते रेयः सिरजोन होबा जना। ओते बनइ ओन्डोः ओते रेयः सुगड़ा सुन्दर नेल केते ततङ एसुः इ रांसा जना। रांसा ते अकुल-बकुल लेना। रांसाते मिसाए लेयोनेन, मिसाए जोकोनेन तना। नेन ओते ओकोन तः दो सोमन गे बइ जना। ओकोनतः दो डकुड-मुकुड बइ जना। ओकोनतः दोड़ा-मोड़ा ओन्डोः ओकोनतः दो चुमकुड-डुमकुड गे बइ जना। ओकोनतः दोड़ा बइ लेना, एनतः दो दोरेया बइ लेना। ओकोनतः डकुड-मकुड बइ लेना, एनतः दो बन्दा पुकुरि को बइ लेना। ओकोनतः लोर-लोगोर बइ जना। एनतः दो गड़ा बइ जना, ओन्डोः ओकोन तः डिपा बइ लेना एनतः दो बुरू को बइ जना। एनकागे ओकोनतः सोमतोल बइ लेना, एनतः दो ओते सोमतोल गे बइ जना।

जियु-जोन्तु को सिरजोन

एसु सुगड़ा ओते, बुरू, गड़ा, बंदा, पुकुरि ओन्डोः दोरेया बइ जना। मुसिङ दिन ततङ गोटा दिसुम होनोर जना। सिः सोः ए ओते दिसुम नेल केड़ा। नेंगेड़ा पताड़ा बिर बुरू कोः नेल केड़ा। ओते दिसुम रे, बिर बुरू रे जिबोनन जियु-जोन्तु को सिरजोन को तेयः उड्डुः केड़ा। किलिमिलि तसङ दुम्बु, ओन्डोः दरू को सिरजोन तेयः उडुः केड़ा। ततङ किलिमिलि जङ को हेर केड़ा। बिड केड़ा। सोमए सुगड़ा लेकाते हेर बिड़ जङ को ओमोन लेना। दिन बोचोर लेकाते ओते दिसुमतसङ दुम्बु ते, नइते दरू ते पेरोः लेना। संगि लेना। बिर बुरू दरू कोते सहजो सिंगर लेना। ओते हसा तसङ दुम्बु ते सुंगड़ा सिंगर लेना। ततङ जकेड सुगड़ा सुन्दर ओते दिसुम नेलतेः रसिका जि लेना। एन्ते ततङ सुगड़ा ओते दिसुम रे होयो रे दःरे तइ-तपइन जियु-जोन्तु को सिरजोन तेयः योजनाः बइ केड़ा। ओते होयो ओन्डोः दःरे तइन किलिमिलि जियु-जोन्तु, बिर जिलुको, चिदुचोपोरोड को दः जियु को जोड़ा-जुडिः सिरजोन केड़ कोआ। दिन बोचोर लेकाते जियु-जोन्तु पुंजि पोवा, संगि नितिर लेना।

        ततङ नेन सुगंड़ा दिसुम रे, दिसुम रेयः सोबोन जिनिसि कोः बइकेड़ा। सोबोन जियु-जोन्तु कोः सिरजोन केड़ कोआ। मेन्दो मनोआ को बं कुते एसकर गे ओन्डोः अःए सुमड़ गेःए तइ केना। एसकर सिःसोः ए रे जिबोन कोलोमोलोगेःए अदाए तइ केना। मनोआ को क तनते, जिबोन जि रे जान रांसा-रसिका क तइकेना। एनका उड्डुः विकोल ते अःए मनोआ को सिरजोन तेयः योजना बइ केड़ सिरजोन बलेः कुइ होन, लुकु लन्डा लुन्डु गेः मेड़ाइ तन। इमितङ गे ततङ उजुः लेना। लुकु सेकेड़ागे ततडअः कुलि ओतोङ किःअ। हे ततङ? अंञ जपः रे ओकोन नमा बलेः कुइ होन गितिः आकना? ओकोनए ते उजुः अकना। निदो चिकन नुतुम तिए? नियः एंगा अपु को ओकोप रेको तइना? नि चिकन जति तनःए? चिकन किलि तनःए? अञ जपः रे गितिः दुमा कना। कचि, गियुःइ तना। ततङ, लुकुअः सोबेन कुलि कोनोः जगर को गेरमोञ चेरमोञ तेः दुरङ हलइया। ततङ दुरङ-        

                              अमः जुड़ि अमः गतिम गे 

                              नुतुम सकि "लुकुमि'मइ गे

                              डुलड-मुलड इनुङ मरङ अबेन तबेन गे। 

रूप तबेन तन्गा-तन्गा 

होमोहो तबेन बेन्गा-बेन्गा

 जङ होमोहो, मयोम हपाटिड अबेन तबेन गे।

                            जति-पति अबेन तबेन

                             किलि-मिलि हपाटिङ तबेन 

                            तइन सुकु जिबोन जुड़िम अबेन तबेन गे।

सिंगि चन्दुः को मेनः जोका

 ओते दिसुम मेनः जोका

 तइन सुकु जोरोङ जुड़ि जिबोन जुड़िम गे।

            एनका दुरङे तन इमिते गे लुकुमि मेड केड़ा। ततङ ओन्डोः लुकु दुरङ जगर तनःए नेल केड़किञ। अचाकगे, लुकुमि, तमड़-तुमुड, डालः-डुलुः तनः ए सेन होनोर तनःए। उरूम-उपुरूम लेकागे ततङ ओन्डोः लुकु लुन्डु-लुन्डुः गेः नेल किञ तना। ततङ जपः तः सेनोः जना ओन्डोः कुलि कोनोःइ तना। हे ततङ? अञ ओकोए तनञ? अञ अः चिकन नुतुम? ओकोनए तेञ उजुः अकना? अञ अः एंगञ अपुञ तिकिञ ओकोन रेकिञ तइन तना? अञ अः जति-किलि चिनः तना? ततङ, लुकुमि अः कुलि-कोनोः जगर को बुगि लेकःए अयुम केड़ा ओन्डोः लुकुमि अः कुलि-कोनोः जगर कोःए हल रूआ इया। हे लुकुमि? अम दो मिन्डो कुइ होन तनम। अम सिरजोन लेनम। अम नेन सुगड़ा-सुन्दर दिसुम रे सिरजोन लगिडते, मनोआ को संगि पोवा तेम उजुः आ कना। अम दो "लुकुमि" नुतुम तेमा। अमः एंगम अपुम तिकिञ सिरजोन दिसुम रेगे मेनः किञआ। अमदो हो जति तनम। किलि दो तुसङ नम लेतेम किलि नुतुमेन। ततङ गेरमोञ् लंदा केते ओन्डो: लुकु पा चुन्डाला कएते दुरङ कजि अइ तना। ततङ दुरङ-

                          अमः जुडि अमः गतिम गे 

                          नुतुम सकि "लुकु" कोड़ा गे 

                          डुलड-मुलड इनुड-मरङ अबेन-तबेन गे।

 कोड़ा-कुड़ि रूप तबेन 

 होमोहो बनइ बेन्गा तेबेन 

 होमोहो मयोम मिडगे अबेन हो नुतुम गे।

                     जति पति अबेन तबेन 

                      किलि मिलि कोड़ा रेग किलिन

                      तइन सुकु जिबोन जुड़िम अबेन तबेन गे। 

ओते दिसुम अबेनः तना 

 सिंगर सहजो अबेनः तना 

 मनोअ होनको संगि-पोव दोरोम अबेन तन।

                          सिंगि चन्डुः को मेनः जोका 

                          ओते दिसुम मेनः जोका 

                          तइन सुकु जोरोङ जुड़ि जिबोन जुड़िम गे।

            लुकु ओन्डोः लुकुमि अयः जपः तः केया उजुः लेड किञअ। एन्ते तुमान केड किञअ। बारो जकेड ति सपाब इचि केड किञआ। ओन्डोः सुकु जिबोन, रांसा-रसिका तइन-तपइन जगरः जगारड किञ। "बुगि-लेका तइन बेन, ओन्डोःञ उजुः रूअञ" मेतड किञ एते ततङ सेनोः जनःए। लुकु ओन्डोः लुकुमि मिड रेगे किञ तइन बसा जना। मिसे तेगे किञ इनुङ अ। मिसतेगे किञ होनोरो। मिसे तेगे किञ दुरङ इनुङ, सुसुन इनुङ अ। 

बिर बुरू रेयः बा, जो सांगा हसेड किञ नम जोम केना। बिर जिलु कोकिञ गोःए जोम केना। दःजियु को मन किञ गोःए जोम केना। हड़िन दः सेतेङ दः किञ नु केना। रिमिल लतर दरू उम्बुल रेया होयो रेकिञ गितिःइ केना। हसु दुकुरेकिञ सेपेबा केना। एनलेका अकिञ इनुङ इनुङ ते, होनोर बियुरते, लन्दा जगर ते, सुसुन दुरङ ते, उडुः जिबोन, ते सुकु जिबोन ते ओन्डोः दुकु रे रःगेरङ तेकिञ हरा-मरङ लेना। हरा-मरङ जनाकिञ। हरा-मरङ जन रेयो किञ, टोटा-नेगेड़ा पताड़ा गेकिञ तइन तपइन तन केनाकिञ मिड रेग किञ गितिःइ केना। मिड रेगे किञ जारू केना। मिड तेगेकिञ इनुङ केना। मिड तेगेकिञ होनोर केना। मिङ तेगेकिञ गपति सुसुन केना। मिडतेगे किञ् चरा नम केना।

continous in ...........next part -02