अंतराष्ट्रीय फुटबॉल खिलाड़ी जयपाल सिरका तिकीने: एलादारोम होबायना

 

            आदिवासी हो समाज युवा महासभा पायते एलादाहरा यना: जयपाल सिरका  

चाईबासा : अंतरास्ट्रीय फुटबॉलर जयपाल सिरका चाईबासा हुजु:यन रे आदिवासी हो समाज युवा महासभा ओन्डो: इनुङ् कोरे जांगी मिसा कन को चाईबासा तम्बो चौक रे रांसा रासिका तेको दारोम कि:या। जयपाल सिरका जोका दिन अयर गे थाईलैंड रेयः पटाया रे 20 मार्च यते 30 मार्च जोका होबा लेन एएफसी सॉकर एशियन कप 2025 रे हिताडे इडी लेडा। नेन बदाबादि रे 11 दिसुम रेन खिलाड़ी हितड् को इड लेडा ओन्डो: ब्हरोत रेन टीम 18 सिरमा चनब नेन एशियन कप फुटबॉल टूनार्मेंट रे हितड इडी तेय: मौका को नम लेडा मेंदो नॉकआउट रे कको हुजु दइ यना। एन रेयो गे कोल्हान रेयः नेन ओतेए ते आदिवासी हो हुदा रेन खिलाड़ी जयपाल सिरका तिकीन अंतरास्ट्रीय स्तर रे अपन: ओन्डो: समाज रेयः उनुरूम किङ् उदुब सोदोर केडा ओन्डो: नुतुम किङ् रिका केडा। नेन रांसा गे कोल्हान टयड रे तइयना। जयपाल सिरका एलादारोमि लागिड ते चाईबासा पोस्ट ऑफिस त:अ रे आदिवासी हो समाज युवा महासभा ओन्डो: एसु पूरे हो को सपड़ाओ चि तियर लेना। दामा दुमंग ओन्डो: सुसुन दुरंग लो:ते जयपाल सिरका को दारोम कि:या। ब्ह माला ओन्डो: जोमा: को आजोम कि: तेको सम्मानित कि:या। एन चनब सजाओअ कन गाड़ि रे दुब कि:ते डोंगोल बाजार गोटा को होनोर कि:या। रैली महुलसाई, गितिलपी टाटा कॉलेज तम्बो चौक लेका ते जयपाल सिरका ओव: ते बेटा लेना। एन इमितङ् टयड् टयड् कोरे को दारोम कि:या। एलादारोम पनाइटि रे आदिवासी हो समाज युवा महासभा रेन राष्ट्रीय अध्यक्ष मानतेन हिर्ला इपिल सामड उपाध्यक्ष सुरा बिरुली, महासचिव गब्बरसिंह हेम्ब्रोम, कोषाध्यक्ष, सुरेंद्र पुरती, पूर्व अध्यक्ष बिरसिंह बिरुली, दोरोम सचिव सोमा जेराई, प्रदेश सांस्कृतिक सचिव जगन्नाथ हेस्सा, जिलाध्यक्ष शेरसिंह बिरुवा, कोषाध्यक्ष सत्यव्रत बिरूवा, लेबा गागराई, नगरपालिका पूर्व अध्यक्ष गीता बालमुचु, फुटबॉल कोच युगल पूर्ति, कोच विकाश बालमुचु ओन्डो: सिंहभूम स्पोर्ट्स एसोसिएशन चाईबासा ते अर्जुन बानरा, कुलचांद कुजूर, मानकी कूदादा, सनातन पिंगुवा, मंजीत हासदा, मधुसूदन सामड, महर्षि महेन्द्र सिंकू, हेमन्त तामसोय, गोविंद कालुडिया, शिशिर पूर्ति, विवेक, टिकुल, घोनो, टुडू, मालती हेस्सा, शीतल जारिका  लो:ते  चाईबासा रेन एसु संगी सेपेड फुटबॉलर को ताइकेना.