कुला एंगा ओन्डो: अयःअ होन किङ ho kahani
मुनु काड़रेयःअ कजि। मियड् गुंडि उरिइ ओन्डोः मियड् एंगा🦁 कुला मियड् बिर रेकिङ टइकेना।
अकिङ एसु जुड़ी ओन्डो: जेताओ ककिङ बपागे टइकेना। एन दिपिलं कुलाको जिलु कको जो'म टइकेना, उरि:इ-मेरोमको लेका दुम्बु-तसड़ को अतिकेन टइकेना। एना मेन्ते एंगा कुला क रेन:ए हियातिकेना चि अयःअ जुम्पा जुड़ी उरिइ एटः कुला एमन जा को चिकइतेया।
एंगा कुला बरिया हो' होनकिङेए होनन् टइकेना। एन् होनकिङ एसु मो:ए-मोए ओन्डोः पकोड़ोगेकिङ हरा मरङो:तन टइकेना। मुसिं तरा सिंगी गुंडी उरि:इ अन्डो एंगा कुला गड़ा दःअ नू तेकिङ सेनलेना । गुडि उरिइ गड़ा चेतन पारे ओन्डोः एंगा कुला लतर पारे दःअकिङ नूतन टइकेना।
गुंडी उरिइ दःअ नू नूतेःए इई केडा ओन्डोः इई गुरिइ दःअरे लोवामेयन्ते एंगा कुला नूतन पा ते अतु आंदूयना। एंगा कुला गुरिइ लोवम् दःअःए नूकेडा ओन्डो: एसु नोगोड़ सिबिल कि:इया । एन्तेःए उडुतना चि अयःअ इई गुरिइ लोवम् दःअ निमिन सिबिल तेदो अय:अ होमोह् जिलु चिमिन तोरं नोगोडा। एन उडुः कुलाःअ मोलोंरे सरूबेयना ओन्डोः गुडी उरि:इ जोमिइ लगिङेःए उडुदिटाकेडा ।
द:अ नूके ते रूहाउरातनरे एंगा कुला चनब होरा गुंडि उरिइ दोयारे ए आंइल चोपड़ेयना ओन्डो: होटो: रेए हुआः गोःए कि:इया लःइ बियुः उरि:इ जिलुःए जोमकेडा ओन्डो: जं कोदो ए सरे:तडा। ओवः बेटाउराय-रे होनकिङ कुलिइ तना "मां गुंडि उरि:इ अमलोः कःए हुजु-लेना। ओकोन रेम बगेयातुःइया।" इदु हपाते ए सेनोःयना, कञ अदाना मेतडकिङा। एन गपातेर होनकिङ मिडतःअरे उरिइ जं किङ नमतडा। जं नेलकडे तेकिङ अटकरकेडा चि अकिङअ एंगा गुंडि उरिइ दो जोम कि:इया । एन्ते अकिङ अकिङ जपगरतना चि अयःअ जुड़ि गुंडि उरिइअ जिलु मयोम रेय:अ नोगोडे:ए नमकेड् तेदो मुसि बनो मुसि अकिडो:ए जोमकिङ गया। एनलेका किङ उडुकडे ते एंगा कुला गितिःइ जपिडाकनरे हके तेकिङ कोड़म गो:ए कि:इया ओन्डो: एन्तः अएतेकिङ निरेयना ।
बुरू सनिङ् होरा सेनकेड तयोम मियड् डोंगोल (शहर) रेकिङ बेटायना । एन्तःअ बेटायन रेकिङ अटाकरकेडा चि एन डोंगोलरे मेन:अ हो को एसु बोरोरे मेनःअकोवा, चिना मेन्ते चि जाओ निदा मियड़ कुला हुजुःवा ओन्डो: मिडो' बनो मिडो हो गो:इगेयाःए एन कुला गोइतेया ओकोएओ कको बोरसाएतना । एन डोंगोलरेन राजाओ एसुःए मुकुञचबाकना (परेशान) पोर्जा को हरदुः लगिड़ राजा डकरा इचिकेडा चि ओकोए एन कुला गोःए दहइया इनिइ तरा चटः राइज लो' (राज्य) होन्ते कुड़िओ:ए आंदियाइया । कुला होनकिङ मेन्ते कुलाको गोःए तेयःअ अकिङरे एनेतो मेन:अ। निदा पङ कुलाकिङ लोड़ोकि:इया ओन्डोः किङ गोए कि:इया । राजा अ डकरा लेकाते मरनि:इ राजा अ होन एरालो: ए आंदियाना ओन्डो: राजाओ:ए राजायना। एन्लेकाते चनब दो उन्डिबोया एसु रांसा तेकिङ टइयना।
Comments